امتحان اللغة العربية للإعدادية المصرية
السؤال الأول: التعبير
اكتب ما لايقل عن 950 سطرا فى أحد الموضوعات الآتية:
'لم يجد الطفل غير الشارع ملجأ نظرا لحالة البلد الهباب..فاتجه إلى السرقة والقتل والحشيش.. حتى نال جزاءه وقبض عليه متلبسا بباكتة بانجو..' اكتب قصته مع تسليم حِرز البانجو للباشا مراقب اللجنة
'شهدت بلدنا الحبيبة نهضة فى مجال التشييد والبناء وخصوصا بعد وصول سعر الحديد إلى 6500 جنيه للطن.. اكتب ما يمليه عليك ضميرك على أن يبدأ موضوعك بعبارة أنا باشتغل فى حديد عز'
'بعد انتشار ظاهرة أكل لحم الكلاب والحمير..من وجهة نظرك كحمار تكلم عن هذه الظاهرة ومن المتسبب فيها' بدون غلط..الورق متراقب
ــــــــــــــــــــــــــــــــــــــــــــــــــ ـــــــ
السؤال الثانى: القصة
من قصة ' عليا الطلاق ما انت داخل الانتخابات' .. اقرأ القطعة وأجب عن الآتى:
(ثم أتى إليه وضربه بالجزمة وقال: انت عايز تترشح فى الانتخابات ياروح أمك؟؟ دانت عايز معجزة..مش كفاية بتاكلوا لحمة ومستورين.. عايزين إيه تانى يابهايم؟)
الأسئلة:
1-ما هى اللحمة؟ أو على الأقل حدد أقرب معنى خيالى لها
2-مرادف معجزة فى اللغة هو: ( تغيير وزارى – زيادة المرتبات – رغيف العيش) اختر يا مقلول البخت
3-لماذ ضربه الرجل بالجزمة وليس بالعصا مثلا؟؟
(أهو كسل .. لسة هيرفع العصاية؟ - عشان العصاية قلة قيمة برضه واحنا فى عصر الديمقراطية – عشان العصاية شغالة في أقسام الشرطة بس مش فى الضرب.. افهم انت بقى) اختر
4-حلل بمزيد من التفصيل جملة 'ضربه بالجزمة' وبين مدى توافقها مع جملة 'مصر بتتقدم بينا'
ــــــــــــــــــــــــــــــــــــــــــــــــــ ــــــــــــ
السؤال الثالث: النصوص
أجب عن أحد السؤالين الآتيين:
من نص ( ماشربتش من نيلها) للشاعرة الكبيرة شيرين..اقرأ ثم أجب:
(ماشربتش من نيلها.. جربت تغنى لها.. جربت فى عز ماتحزن تمشى ف شوارعها وتشكى لها)
1-بعد إعلان صاحبة النص عن رغبتها فى أن تلد ابنتها فى أمريكا لتحصل على الجنسية الأمريكية..اختر:ما المقصود بنيلها فى النص؟
(المسيسبى - الأمازون – يونج يانج)
2- هذا النص من نصوص الحزب الوطنى والدليل وجود اسم مهم من قيادات الحزب فى النص.استخرج الاسم..وبوسه من بُقـُّه ورجَّعُه مكانه
3-أكمل الأبيات إلى آخر كحكة فى الكليب
4-قوبل النص بانتقادات بسبب بعده عن الواقع..وضح من النص ما يتفق مع القول المأثور اطبخى ياجارية .. كلف يا سيدى
ــــــــــــــــــــــــــــــــــــــــــــــ
السؤال الرابع الخط
كوز المحبة انخرم..طرطش على كمى..ياحبيبى بطل جفا وارحم عذاب أمى
اكتب الجملة السابقة ثلاث مرات بثلاث خطوط.. موبينيل وفودافون واتصالات..كما يمكن التحويل من خط لخط بنفس الرقم.. فقط اتصل بخدمة العملاء
